ДВАЈЦА МАКЕДОНСКИ ТУРИСТИ СЕ УДАВИЈА ВО АЛБАНИЈА

Надлежните органи на Република Албанија работат на целосно расчистување на случајот, велат од македонското Министерство за надворешни работи. 

Според информации добиени од македонската Амбасада во Тирана, телата на двајца државјани на Република Северна Македонија се пронајдени починати во морето, близу Каваја.

„Двајца се мажи (М.М. и Ц.М.) од Битола. Според информациите од нашата амбасада во Тирана, надлежните органи на Република Албанија работат на целосно расчистување на случајот. Министерството за надворешни работи останува во контакт со албанските власти преку нашата амбасада“, велат од МНР.

Албанските медиуми јавуваат дека двајцата биле блиски пријатели кои на албанскиот брег дошле заедно со група од 52 туристи. 

Министерството за здравство информира, согласно податоците од Институтот за јавно здравје:

Во последните 24 часа се направени 6.591 тестирањe, а регистрирани се 882 нови случаи на КОВИД-19:

Скопје – 333, Тетово – 109, Струмица – 80, Куманово – 59, Гостивар – 46, Кичево – 42, Штип и Дебар – по 28, Охрид – 20, Велес – 18, Прилеп – 17, Струга – 14, Кавадарци и Кочани – по 12, Битола и Свети Николе – по 9, Ресен – 8, Богдани и Кратово – по 6, Неготино и Радовиш – по 5, Гевгелија, Виница и Македонски Брод – по 3, Делчево и Пробиштип – по 2, Берово, Крушево и Демир Хисар – по 1.

Регистрирани сe 140 оздравени пациенти од: Скопје – 53, Гостивар – 48, Кичево – 11, Штип – 6, Тетово и Кочани – по 4, Кавадарци и Пехчево – по 3, Битола и Виница – по 2, Охрид, Ресен, Делчево и Берово – по 1.

СЛОВЕНИЈА, АВСТРИЈА, РУСИЈА СО СТАВ ЗА БЕГАЛЦИТЕ ОД АВГАНИСТАН

Нема да дозволиме да се повтори стратешката грешка од 2015 година, вели словенечкиот премиер Јанез Јанша. 

Тој ја искоментира состојбата во Авганистан. 

„Европската унија нема да отвори никакви хуманитарни или миграциски коридори за Авганистан. Ќе им помогнеме само на поединците што ни помогнаа за време на НАТО операциите во Авганистан. И на членките на ЕУ што ја штитат нашата надворешна граница“, напиша тој на Твитер на словенечки јазик.

Австрија не сака да прими бегалци. Австрискиот канцелар Себастијан Курц вели дека не сака да прима нови бегалци од Авганистан и покрај тоа што земјата ја презедоа Талибанците.

Русија не сака да прима бегалци. Рускиот претседател Владимир Путин денеска повика Русија да го спречи приливот на бегалци од Авганистан, каде власта ја презедоа Талибанците. Тој изјави дека џихадистите можат да влезат во земјата под маска на баратели на азил.