Дополнителна помош од Европската унија во износ од 30 милиони евра за справување со последиците од бегалската криза во Западен Балкан ќе добијат Македонија и Србија. 

Решението е прифатено доцна синоќа и според него издвоените средства ќе се користат за управување на границите и за обезбедување на засолниште и други услуги за бегалците. 

Од Европската комисија велат дека оваа сума се дава и покрај 59-те милиони евра кои веќе беа доделени на двете земји од почетокот на кризата во 2015 година.

„Одобрениот пакет ќе помогне за понатамошно подобрување на менаџерските способности кога станува збор за границите и миграцијата во регионот. Ќе овозможи продолжување на поддршката на граничната полиција со цел контрола на границите да се врши во согласност со европските стандарди. Средствата ќе обезбедат поддршка за оние кои се одговорни за основните потреби на мигрантите и бегалците, какви што се сместување, здравствените услуги и заштита“, пишува во соопштението на ЕК.