На повидок нова дигитална алатка, која ќе биде промовирана следната недела, а преку која ќе можете да ги „ѕирнете“  трошоците на државните функционери, како министри, заменици-министри и државниот секретар.

Министерот без ресор задолжен за комуникации, отчетност и транспарентност Роберт Поповски на денешната јавна дискусија со учесници од НВО-секторот за размена на мислења и идеи за актуелните владини политики поврзани со нејзината транспарентност, истакна дека во тек е изработка на софтверот за следење на овие трошоци кој ќе понуди точни информации, но и наративен извештај за наведените трошоци.

Според Илија Жупановски од Секторот за медиуми во Владата, употребата на ваква алатка за дигитална транспарентност е светски тренд, а целта е меѓу другото да се држат трошоците на овие функционери на најниско ниво. На почетокот ќе биде опфатена група од 60 функционери и таа листа на опфат понатака ќе се прошири. Се предвидува на крајот од месецот обврска за министрите, замениците-министри и државните секретари да доставуваат извештаи за нивните трошоци.

Се зборуваше и за обезбедување на поголема транспаретност преку медиумите, но чекор по чекор.

– Убедени сме дека тоа не е доволно, ќе одиме на објавување и на материјалите, на записници од седниците на Владата, но молиме за трпение.- порача Поповски.