Џафери потврди дека седниците во Собрание ќе ги води на албански јазик, но од крајот на месецот.

Како што пренесуваат медиумите откако ќе завршат подготовките Џафери ќе почне да претседава со пленарните седници на албански јазик.

-Не се раководам од очекувањата, во смисла кога. Моите одлуки зависат од мене и од тоа кога ќе ценам. Секоја активност има потреба од подготвителен период, а порано кажав дека тој период ќе трае до крајот на месецот за да може да се организираат службите и за да може да се спроведе целосно и квалитетно одредбата од Законот за употреба на јазиците во смисла на водење на седниците. Како што знаете претходно јас сум ги користел комбинирано двата јазика без оглед дали законот беше во сила или не. И кога не беше донесен законот при првото водење на седницата во 2017 година ја водев комбинирано, значи немало пречка околу тоа. Но работата е што како законодавен дом ги чекавме сите пердуслови во однос на она што е законска рамка во легална смисла да се води седницата, рече Џафери.

Сепак според Џафери не е противуставно тоа што Владата го испрати Законот за употреба на јазиците до Венецијанската комисија 

-Постапката за утврдување на кој било законски проект во соодветната европска комисија не е во никаква спротивност со Уставот, рече Џафери и упати на Владата за поконкретни одговори бидејќи тоа не е во надлежност на Собранието туку е владина одговорност.