Директорот на Фондот за здравствено осигурување Сашо Клековски денеска изјави дека тројца од повредените во пожарот во кочанската дискотека се на болничко лекување, а двајца се во тешка, но не и во критична состојба.

Ова го кажа по увидот во градежните работи на новото физикално одделение во општата болница во Кочани. 

Двајца од пациентите се на домашнo лекување, а шест повремено одат на контрола во болницата во Софија.

„За неколку дена бројот на повреденени се намали на тројца, двајца се пуштени на домашно лекување, еден се врати од Турција и тој е дома и еден е пуштен на домашно лекување од пластична хирургија во Скопје. Еден повреден е на лекување во Истанбул и двајца се наоѓаат во приватната болница Систина, двајца се во тешка состојба, но не критична. Кај двајца со отворени рани е потребна интервенција и ќе бидат третирани во Кочани. Фондот ги покрива трошоците за контролите на 6 пациенти кои повремено имаат потреба да одат во болницата во Софија каде беа на лекување“, изјави Клековски.

Во меѓувреме пластичен хирург од Белгија дошол во Македонија и прегледал 18 пациенти со изгореници на лицето, рацете и вратот на кои ќе им биде потребен подолг третман. 

На 16 март годинава во пожар во дискотеката Пулс во Кочани, загинаа 62 луѓе, а повредени беа околу 200.