Државниот завод за статистика реагираше со демант откако предлог-законот за попис кој беше симнат од закажаниот дневен ред на собраниската комисија беше осуден од ВМРО-ДПМНЕ дека се носи со брза постапка за да се избегне дебата, по што опозициската партија најави и можен бојкот на истиот.

„Државниот завод за статистика остро ги демантира лажните вести кои се однесуваат на толкувањето на одредени членови во Законот.  Јавната дебата за Предлог-текстот на Законот за Попис започна во средината на 2018 година, при што јавноста беше запознаена со Предлог-текстот преку голем број интервјуа во медиумите и со широка расправа што ја организираше Заводот и во која беа опфатени граѓанскиот сектор и истражувачките центри, академската заедница и медиумите. По оваа фаза, Предлог-текстот на Законот беше поставен на страницата ЕНЕР и беше достапен за забелешки, коментари и сугестии. Треба да напоменеме дека не беше добиена ниту една забелешка“, велат од заводот.

Од таму велат дека статистичката операција се подготвувала според сите стандарди и препораки на Обединетите нации и Евростат,а Предлог-законот бил со европско знаменце е затоа што тој е еден од главните бенчмаркови кои ги бара Европската комисија.

„Државниот завод за статистика, како и досега, стои на располагање за какви и да било појаснувања во врска со пописната активност и одредбите на Законот за Попис и остро се спротивставува на изнесувањето невистини во однос на оваа извонредно важна статистичка операција за земјата во целина и за секој поединец одделено“, додаваат од таму.