Ако не се почитуваат меѓународните регулативи до 2050 Македонија ќе стане пустина, велат од Еко-свест. 

Невладината организација го поздравува афирмирањето на зеленото сценарио од стратегијата за развој на енергетиката до 2040 година, но е загрижена од изјавите на владините претставници кои беа контрадикторни со целите на зеленото сценарио.

Доколку долгорочната визија ни е енергетска транзиција и премин кон обновливи извори на енергија како и 51 отсто намалување на емисиите на стакленички гасови, зошто слушаме изјави за продолжување на рокот на траење на РЕК Битола и гасификација на државата, реагираат од центарот за истражување Еко-свест.

„Продолжувањето на рокот на траење на РЕК Битола и гасификацијата само ќе ни ги заробат инвестициите во фосилни горива за чие согорување по 2030 ќе трпиме сериозни финансиски загуби, а истите ќе продолжат да причинуваат штети по здравјето на луѓето и климата дополнително осиромашувајќи нè. Потпишувањето на договорот за грант со KfW потврдува дека имаме и други опции, меѓу кои соларна топлана, кои во иднина ќе ги истиснат фосилните горива“, додаваат од Еко-Свест. 

Велат дека граѓаните трпат штети од лоши и некоординирани политики. 

foto freepik