Три деца вчера добиле сериозно труење откако  во продавничката до основното училиште „Ацо Шопов“ во скопската населба Радишани купиле енергетски пијалак „симба" и го конзумирале. 

Од Агенцијата за храна и ветеринарство велат дека се информирани за настанот во кој 3 малолетни деца се хоспитализирани во Детската клиника во Скопје. Сепак од епидемиолошката служба на Центарот за јавно здравје – Скопје,  немаат добиено информација за пријава за труење со храна и за хоспитализирани лица.

„Производот „симба“ кој во медиумите се посочува како причинител на труењето со храна на малолетните лица е безалкохолен пијалак, на кој соодветно е означено дека не се препорачува за деца под 18 години и за бремени жени. Не станува збор за небезбеден производ, ниту за труење со храна, туку за непочитување на означувањето од страна на лицата кои го консумирале“ - стои во соопштението. 

Во тек е постапка од надлежните институции за тоа како овој пијалак дошол до малолетните лица.