По првите часови од тест-периодот на системот „Безбеден град“ (Safe City), кој регистрираше повеќе од 65.000 сообраќајни прекршоци, реакциите не изостанаа. Меѓу првите што јавно се огласија беа поранешните пратеници Рубин Земун и Маја Морачанин, кои упатија критики до Министерството за внатрешни работи.

Земун откри дека добил три електронски опомени за пречекорување на брзината — со 51, 54 и 56 километри на час. Според него, овие казни се претерани и резултат на нефункционален систем за регулирање на сообраќајот. „Време е МВР да размисли и за граѓаните. Да направи зелен бран на Партизанска, за да може со 40 км/час да се поминат барем неколку раскрсници. Сега од еден до друг крај на Сити Мол фаќаме само црвени светла“, напиша тој на социјалните мрежи.

Тој додаде дека голем дел од прекршоците се со минимални отстапувања од дозволената брзина и предупреди дека граѓаните би можеле масовно да бидат казнувани без реална причина.

На критиките се надоврза и експратеничката Маја Морачанин, која побара воведување на „зелен бран“ и за возилата и за пешаците, како што функционира во некои европски градови. Таа укажа дека на некои скопски раскрсници зелено светло за пешаци трае премалку, што ги тера граѓаните да преминуваат на црвено.

Реакциите следуваат по првиот ден од стартот на системот „Безбеден град“, кој регистрираше илјадници возачи што ја пречекориле брзината за само неколку километри над дозволеното.

И докторот Нико Беќаровски со коментар.