Во Скопје 10 годишно дете на клупа во училиште напишало заканувачки текст, по што полицајци разговарале со него. 

Полицијата соопшти дека денеска полициски службеници од ЕВР Аеродром и Драчево при СВР Скопје извршиле службен разговор со малолетник и со неговите родители, постапувајќи по пријава од основно училиште на територија на општина Аеродром. Известен е јавен обвинител и Центарот за социјални работи. Полицијата вели дека преземаат мерки за целосно расчистување на случајот.

Претходно, ученици во Скопје составувале список со имиња на соученици, а и во Тетово две деца кои имале по 11 години оставиле писмо со закани во тоалетот во училиштето, по што со родителите се повикани во полиција. Гимназијалец во Штип деновиве е уапсен откако на Инстаграм упатил закани. Кај ученик во Крива Паланка е најден нож. Во Србија имаше два масакри, од кои едниот во училиште, по што полицијата во земјава презема мерки доколку има закани.