Mинистерката за правда, Рената Дескоска вели дека претстојниот референдум ќе се спроведува по постоечкиот Закон, а по завршувањето на референдумот ќе се донесе сосема нов закон со современи стандарди. 

На гостувањето во емисијата „Топ тема“ на Телма, Дескоска рече дека побезболно е сега да не се прават дури ни технички измени на Законот и референдумот да биде спроведен врз основа на постоечкиот закон отколку да се направат измени и да се поттикнат сомневања дека нешто се сака да се подметне.

„Факт е дека законот е застарен, дека е нефункционален и многу прашања ги остава со прашалници, но факт е и дека врз основа на тој закон беа спроведени референдуми како оној во општина Центар за изгледот на Градскиот трговски центар или во неколку други општини за рудниците“- вели Дескоска.

Вели дека  лошо е да се условува изборот на Државната изборна комисија со други прашања бидејќи тоа е комисија која треба да постои имајќи ги предвид нејзините надлежности не само за референдумот, туку и за други прашања како што е она за Избирачкиот список.