Оливер Дерковски, претседателот на Државната изборна комисија, рече дека утре ќе биде објавен Избирачкиот список за парламентарните избори на 12 април и дека на истиот ќе има 1.817.028 избирачи.

Сепак, првиот човек на ДИК алармираше дека во подрачните одделенија на МВР има огромен број на изработени лични карти, кои не се подигнати, и тие лица нема да може да гласаат.

- Бројката е сериозна. Над 38.000 лица немаат подигнато лични карти, а тие им се изработени. Нема да можат да гласаат доколку не ги подигнат. Со личните карти немаат проблем во МВР, засилен им е административниот капацитет. Не ги подигнуваат, моментот на подигнување е запишувањето во избирачкиот список, рече Дерковски.

Една од новините според новото законско решение е и тоа што на денот на изборите ќе може да гласаат и оние лица кои на тој датум навршуваат 18 години. 

- Ќе има посебен список и за сите граѓани кои на истиот ден ќе наполнат 18 години, наведе Дерковски.

Тој најави дека од утре започнува собирањето на потписи за независни кандидатски листи, а за прв пат тоа ќе може да се направи и на нотар. Собирањето наместо 15 дена како до сега, ќе трае 10 дена.

- Од утрешниот ден започнува собирање на потписи. Најмалку 1.000 потписи  се потребни за своја кандидатска листа. Освен пред ДИК, може да се собираат и пред овластени нотари пријавени во ДИК. Но за тоа трошоците ќе си ги поднесат самите собирачи, тврди претседателот на комисијата.