На денешното рочиште за „Монструм“, чиј застапник на обвинението е Фатиме Фетаи од СЈО, треба да бидат презентирани транскриптите кои се воедно и новите докази за убиството кај Смилковското езеро.

Необјавените ,,бомби” за случајот ,,Монструм” содржат разговори, СМС пораки и за нив се изработени транскрипти на македонски и на албански јазик.

За петкратното убиство кај Смилковско езеро на 12 април 2012 година, кога беа убиени момчињата Кире Тричковски, Филип Славковски, Цветанчо Ацковски, Александар Наќевски и рибарот Борче Стефановски, на доживотен затвор беа осудени Алил Демири, Африм и Агим Исмаиловиќ, Фејзи и Хаќи Азири и Сами Љута.

Врховниот суд во декември 2017 година ги укина пресудите, и случајот го презеде СЈО и е вратен на повторно судење.

Судијата Огнен Ставрев денеска рече дека обвинители за овој предмет и натаму се Фетаи и Гаврил Бубевски од СЈО, бидејќи не добил известување дека овој случај се враќа кај редовното јавно обвинителство предводено од Љубомир Јовески.