Очекуваното времетраење на работниот век во Европската Унија достигна 37,5 години минатата година, што претставува зголемување од 0,3 години во споредба со 2024 година и дури 2,3 години повеќе отколку во 2016 година .

Актуелните трендови се прикажани според податоците објавени од европската статистичка служба Евростат.

Каде е очекуваниот работен век најдолг, а каде најкраток?

Најдолг очекуван работен век е забележан во Холандија , каде што е 44 години . Потоа следуваат Шведска со 43,4 години, Данска со 42,6 години, Естонија со 41,5 години, Ирска со 40,7 години, Германија со 40,2 години и Финска со 40,1 година.

На спротивниот крај од спектарот, Романија бележи најнизок очекуван работен век од 32,7 години , по што следат Италија со 33 години и Бугарија со 34,6 години.

Мажите најдолго се на пазарот на трудот во Холандија, а жените во Шведска

Мажите во Европската Унија можат да очекуваат просечен работен век од 39,5 години , додека за жените овој индикатор е 35,4 години .

Најдолг очекуван работен век на мажите е забележан во Холандија со 45,9 години , по што следат Шведска и Данска со по 44,5 години. Кога станува збор за жените, тие најдолго остануваат на пазарот на трудот во Шведска со 42,3 години , по што следат Холандија со 41,9 години и Естонија со 41,8 години.

Индикатор за учество на пазарот на трудот, а не законска граница за пензија

Според методологијата на Евростат, очекуваниот работен век претставува просечен број години што едно лице на возраст од 15 години може да очекува да ги помине на пазарот на трудот, вработено или невработено, врз основа на моменталните стапки на учество во работната сила и очекуваниот животен век.

Овој индикатор не ја претставува законската возраст за пензионирање или препорачаната должина на работниот век , туку ги одразува моделите на учество на населението на пазарот на трудот.

Колку години работат Балканците?

Според официјалните податоци на Евростат (Eurostat), просечниот очекуван работен век на Балканот е пократок во споредба со просекот на Европската Унија, кој изнесува околу 37.5 години.

Во земјите од нашиот регион, луѓето во просек поминуваат меѓу 31 и 35 години на пазарот на труд (вклучувајќи период на вработеност и евентуална невработеност во текот на животот).