На социјалните мрежи од синоќа се споделува смс порака која наводно била напишана од убиената Росица К. од Велес, а која била упатена до министерот за внатрешни работи Панче Тошковски. Автентичноста не е потврдена, но во пораката има наведени броеви од судски предмети.

Медиумот 24 инфо, потврди дека бројот на кој што е испратена пораката му припаѓа на министерот Тошковски.

Иако на фотографијата не се гледа телефонскиот број ниту датум кога истата е испратена, јавноста се крена на нозе.

Во пораката, Росица К. пишува дека со месеци е жртва на тепање, силување, прогон и закани, како и дека автомобилот ѝ бил запален пред пет дена. Најшокантниот дел се однесува на тоа дека осомничениот, и покрај историјата на насилство, повторно го добил пасошот и заминал во странство.

Фотографијата доаѓа на една недела по убиството на Росица К., и нејзиниот татко. Убиецот по убиството се самоуби.