Царинската управа во октомври повторно ја надмина недостижната наплата на приходи – во Буџетот слеани 12,05 милијарди денари (196 милиони евра), за 11,4 милиони евра повеќе од лани, при што најголем раст од 16,6 проценти е забележан во наплатата на приходи од царина. Ова го посочи директорот Бобан Николовски, кој исакна дека се зголемени контролите, има поголемата институционална соработка и партнерски однос со компаниите, што спроед него се едни од причините за растот. 

- Приходите од наплата на давачки при увоз на возила се зголемени за 11 проценти. Од почетокот на годинава досега се поднесени 89 кривични пријави за сторени кривични дела со возила. Царинската управа, во изминатиот период работи на сите фронтови. Заклучно октомври поднесени 174 кривични пријави. Резултатите се препознаени и од Европската комисија, која во последниот извештај нотира високо ниво на напредок во поглавјето Царинска унија со кое раководи Царинската управа - укажа Николовски.  

За зголемената наплата на приходи, што беше истакнато и од Европската комисија, директорот вели дека денес предизвикот е поголем бидејќи целта е да се надминат резултатите што се остварени од поставување на новото раководство.

- Дадовме гас до максимум, предизвик ни е да се надминеме самите себеси, да ги надминеме резултатите што самите ги постигнавме. Од почетокот на годинава, заклучно октомври  наплативме приходи од 1,77 милијарди евра, за 89,4 милиони евра повеќе споредбено со лани. Ова се повеќе пари за болници, училишта, патна и железничка инфраструктура.. Дадовме силен поттик, вистински пуш во економијата - вели Николовски.

Воедно укажа дека преку зголемена ефикасност во контролите евидентирани 347 случаи на заплени - 318 килограми дрога, 237 илјади парчиња цигари и дополнително 264 килограми други тутунски производи, околу 10 илјади парчиња лекови, над 3 килограми злато..

Во однос на начинот на кој е постигнат висок напредок, тој вели дека „само со зацртана цел и визија и добар тим, резултатите ќе бидат видливи и мерливи“.