Владата на Република Македонија достави предлог до Македонски Телеком за избор на нови членови на Одборот на директори, додека пак повеќето актуелни членови треба да се разрешат. 

На владина седница е одлучено разрешени да бидат Жарко Луковски, Панче Кралев, Небојша Стајковиќ, Александар Стојков и Владимир Здравев. 

На нивно место Владата во Одборот на директори на Македонски Телеком ги предложи Горан Трајановски кој истовремено треба да биде избран и за Главен оперативен директор на друштвото, потоа Сашо Велевски, Замир Мехмети за неизвршен независен член, Дивна Ефтимовска за неизвршен независен член, Анета Симеска и Назим Буши кој треба да биде реизбран.

Трајановски има долга кариера во Македонски Телеком на различни позиции и учествувал во реализација на повеќе проекти. Тој има дипломирано на Електротехнички факултет Скопје како инженер по електроника и телекомуникации, а магистрирано Технички универзитет Габрово за индустриски менаџмент. 

Трајановски бил дел и од владините тела, назначен за помошник министер за информатика и телекомуникации, државен советник за информатика и телекомуникации во МВР и основач е на две приватни фирми.