Тетово го достигна пикот, не треба да се претерува со дополнителни мерки, вели заменикот министер за здравство Илир Хасани. 

Додава дека капацитетот на Тетовската болница е флексибилен до 130 места. 

„Ние ги гледаме сите параметри во Комисијата за заразни болести, утре во осум часот има нова средба и ќе се дискутира за нови мерки. Лично мислам дека не треба да се претерува со мерките затоа што се контрапродуктивни, како собирањето пред маркети, пред и по карантински денови. И овие мерки можат да помогнат, не може да се каже дека народот е недисциплиниран, туку индивидуи. Јас ги поздравувам совесните граѓани, сметам дека не може да се генерализира. Треба да се одржува дистанца, да се носи маска, да не се прават свадби, прослави и забави“, рече заменик-министерот Хасани. 

Со денови Скопје и Тетово се градови со најмногу заразени од коронавирусот. Премиерот Зоран Заев денеска изјави дека не се размислува за карантин, и очекува дека бројот на заболени ќе паѓа. 

Во земјава со денови има над 1.000 заразени, а има и висока бројка на починати.