По трагедијата што ја потресе Северна Македонија на 16 март, кога избувна пожар во дискотека во Кочани, 12 повредени пациенти со авион на војската на Србија беа пренесени во Белград за дополнителна медицинска помош. Како што соопштија денеска пред новинарите во Ургентниот центар на Клиничкиот центар на Србија, во овој центар се примени девет пациенти, додека тројца пациенти се префрлени на ВМА, пишува денеска Euronews.rs.

„Веднаш по приемот почнавме со дијагностички и терапевтски процедури. Во текот на ноќта седум пациенти беа третирани во операциони сали, додека сите пациенти беа приклучени на соодветен третман“, изјави Милан Стојичиќ, директор на Клиниката за изгореници, пластична и реконструктивна хирургија при Универзитетскиот клинички центар на Србија.

Повредите со кои се здобиле повредените се главно изгореници, кои зафаќаат меѓу два и 28 отсто од површината на телото, а повеќето пациенти покажуваат симптоми на оштетување поради отровните гасови што се создаваат за време на пожарот.

Исто така, некои од повредените имаат изгореници на горниот респираторен тракт, поради вдишување топол воздух. Засега повредите се класифицирани како сериозни повреди опасни по живот, а лекарите сметаат дека е голем предизвик да се предвиди состојбата на пациентите поради сложеноста на повредите од изгореници и можните компликации поврзани со респираторни проблеми.

„Тешко е да се процени прогнозата кај изгорениците, особено кога постои компонента на оштетување на респираторниот систем. Прогнозата ќе се кристализира во наредните денови“, вели д-р Стојичиќ.

Што се однесува до дополнителни информации за транспортот на пациентите, засега нема нови информации за можен транспорт на повеќе пациенти до Белград.

„Доколку е потребно, подготвени сме да прифатиме дополнителен број пациенти“, рече тој.