Војната во Иран предизвика пад на акциите на авиокомпаниите, збришувајќи десетици милијарди долари од пазарот, што претставува најголема криза во глобалниот воздушен сообраќај од пандемијата на коронавирусот.

Акциите на германската „Луфтханза“ денес паднаа за 0,8 проценти, додека австралиската „Квантас“ (Qantas) ослабе за 2,7 проценти, при што двете компании изгубија повеќе од 10 проценти од својата вредност оваа недела.

Сопственикот на „Бритиш ервејс“, IAG, падна за дополнителни 1,5 проценти, откако загуби повеќе од 11 проценти во претходните три дена, според „Ројтерс“.

Во Азија загубите се исто така значајни, бидејќи акциите на „Кореан Ер“ денес паднаа за 7,9 проценти, додека „Џапан ерлајнс“ ослабе за 2,9 проценти.

Меѓу кинеските превозници, „Ер Чајна“ и „Чајна Саутерн ерлајнс“ забележаа пад на вредноста на акциите во опсег од еден до три проценти.

Авиокомпаниите се дополнително погодени од растечките цени на нафтата, а затворањето на воздушниот простор над поголемиот дел од Блискиот Исток ги принудува да избираат подолги и поскапи рути, особено на летовите меѓу Азија и Европа. Аналитичарите предупредуваат дека цените на авионските билети би можеле да се зголемат доколку сегашната ситуација продолжи.

Регионот на Персискиот Залив е клучен центар и за патничкиот и за товарниот сообраќај, што значи дека прекините влијаат и врз глобалните синџири на снабдување и меѓународната трговија.