Најмладиот и најбогат човек во источниот дел на Европската Унија, Михал Стрнад, парите од јавната понуда на акции на одбранбената компанија CSG ќе ги насочи во нов, диверзифициран инвестициски фонд за Европа и САД.

Стрнад, 33-годишен чешки милијардер кого „Блумберг“ го рангира на врвот на листата на најбогати луѓе во источниот дел на ЕУ, основа инвестициска компанија со потенцијал до 10 милијарди евра за преземања во Европа и во САД.

Дел од средствата доаѓаат од продажбата на удел во одбранбениот конгломерат CSG NV претходно годинава, во рамки на најголемото досегашно ИПО за компанија која се занимава исклучиво со одбранбена опрема.

Новата компанија ќе биде одвоена од CSG и ќе се фокусира на индустрии надвор од одбранбениот сектор. Стрнад во својата канцеларија во Прага навести што точно бара.

- Сакам да биде диверзифицирано. Отворен сум за бизниси во јавниот и приватниот сектор или во недвижности. Сакам тоа да биде во перспективни сектори што растат - изјави Стрнад.

Во новата инвестициска компанија тој веќе префрлил дел од својот имот: удел во прашкиот хотел Four Seasons, клиника за лекување неплодност, локални застапништва за Ферари и Масерати, како и фудбалскиот клуб Викторија Плзењ.

Меѓу потенцијално интересните цели ја навел и локалната имотна структура на компанијата за управување со отпад Marius Pedersen, која наводно е на продажба. Стрнад изразил и голем интерес за преземање медиумски компании.

Czech billionaire Michal Strnad, the richest person in the European Union’s east, is starting an investment firm with potential firepower of $11.7 billion to target acquisitions in Europe and the US https://t.co/tWM6cWRiqV

— Bloomberg (@business) May 15, 2026

Тој располага со околу три милијарди евра капитал од ИПО-то, а со финансиско задолжување смета дека може да дојде до дополнителни 10 милијарди евра.

Чешка во моментов е дом на четворица од најбогатите источни Европејци според индексот на милијардери на „Блумберг“, меѓу кои се и Даниел Кретински и Карел Комарек. Нивното заедничко богатство се проценува на 62 милијарди долари.

Стрнад е во контакт и со Рената Келнерова, втората најбогата личност во Чешка, која ја води инвестициската куќа PPF Group, наследена од нејзиниот сопруг Петр Келнер, кој загина во хеликоптерска несреќа во 2021 година. Со неа разговара за можни соработки.

- Ми се допаѓа Рената како личност. Таа има некако слична деловна приказна како јас, во смисла дека и двајцата сме нови во тој голем свет. Малку сме поинакви од типовите кои почнаа во деведесеттите - изјави Стрнад.

Љубител на спортски автомобили и црно вино, Стрнад на 33 години вели дека парите повеќе не му се главна мотивација, туку создавањето наследство, и тоа во години кога многу негови врсници сè уште бараат работа.

На прашањето која е смислата на понатамошно зголемување на богатството, тој цитирал свој колега.

- Знаете, јас не јадам или не можам да јадам две вечери. И како што вели еден мој колега, не произведуваат златни хамбургери - заклучи Стрнад.

Фото: Принтскрин/Икс