Министерот за здравство Венко Филипче по посетата на болницата во Козле изјави дека станува збор за установа со огромна експертиза на лекари и медицински сестри во третманот со болни од белодробни заболувања. Дополнет е кадарот со експерти, специјалисти по интерна медицина, пред се од клиничкиот центар во рамките на системот на ротација.

-Во следниот период предвидени се и други капацитети. Засега нема зголемување на притисокот кон јавно-здравствените установи во однос на тоа што беше тренд минатата недела. Модуларната болница кај инфективната клиника е целосно испразнета. Во овој момент таму се поставува централен довод на кислород, капацитетот на клиниката не е целосно пополнет, има неколку слободни кревети, но со секојдневна координација и разговор се прави прераспределба по потреба согласно капацитетите и согласно кадарот којшто ротира во сите установи каде се третираат овие пациенти во болниците ширум државата освен во Битола каде што има неколку 4-5 слободни места, во другите инфективни одделенија капацитетите се практично полу празни, потенцираше министерот Филипче.

Истовремено, директорката на Клиниката за инфективни болести, д-р. Милена Стевановиќ, за Фактор потврди дека активностите во Модуларната (монтажна) болница се во полн ек.

-Интензивно се работи на доводот на централен кислород во ова болничка установа и верувам дека за 3-4 дена ќе биде целосно завршена, изјави директорката Стевановиќ.