Националната телевизија „Алфа ТВ“ се соочува со работничко незадоволство.

На социјалните мрежи се појавуваат документи кои според пишаното се новите договори кои на вработените новинари им се доставуваат за потпис, а според кои договорот за работа им се преиначува од неопределено време во определено.

Во одлуката потпишана од управителот на Телевизијата“, Васко Ефтов се наведува: „Заради максимална искористеност на капацитетите и подобрување на работниот процес и медиумски услуги во „Алфа ТВ“ ДООЕЛ Скопје, на сите работници вработени во телевизијата на неопределено работно време им се трансформира работниот однос од неопределено време во определено, со времетраење од 3 месеци, сметано од денот на потпишување на новите договори за вработување“.

Синдикалниот претставник на вработените од „Алфа ТВ“, Сашо Мисајловски, за Макфакс кажал дека ситуацијата во телевизијата е напната и непријатна по што истакнал дека ќе биде побарана средба со менаџментот и доколку не биде повлечена одлуката, целата ситуација ќе се радикализира.