Заменик-претседателот на ДУИ, Бујар Османи, реагираше по денешната конференција на заменик-министерката за транспорт од ВЛЕН, Калтрина Зеколи Шќири, која рече дека ДУИ го користела проектот за автопатот Скопјe-Блаце за собирање гласови низ годините.

Османи вели дека целата постапка е спроведена во ерата на ДУИ, додека со изградбата на првите 2 километри, според него, било невозможно проектот да се трансформира од автопат во главен пат.

„Гледам дека ВЛЕН денес организираше прес-конференција за автопатот Скопјe-Блаце. Со најголема одговорност го кажувам следново: ВЛЕН нема никаков придонес, ниту најмал, во договорот потпишан за овој автопат. Финансирањето на проектот, изработката на документацијата, обезбедувањето финансиски средства, експропријациите, административните процедури и објавувањето на тендерот беа спроведени за време на владата на Демократската унија за интеграција. Во текот на овие две години, ВЛЕН не презеде ниту еден чекор за да го придвижи проектот напред. Напротив, единственото нешто што се обидоа беше да ја блокираат и пренасочат трасата. Фактот што го завршивме првиот сегмент од 2 километри им оневозможи да го претворат проектот од автопат во главен пат. Затоа, оние што не поставија ниту еден камен не можат да си ја земат заслугата за овој проект“, напиша Османи.