Премиерот на Бугарија Кирил Петков потврди дека на 18 јануари ќе ја посети Македонија, како одговор на пратеничко прашање на поранешната министерка за надворешни работи Екатерина Захариева.

-Со одењето на разговори на 18 јануари покажуваме дека добрососедството е фундаментален принцип на нашите односи со Република Северна Македонија. Се надевам дека нашата Влада ќе ја покаже разликата меѓу добрите планови и постигнатите резултати, рече Петков во Народното собрание.

Преговорите со Скопје, според Петков, ќе се одвиваат онака како што е договорено во коалицискиот договор меѓу партиите во владејачката коалиција. Дополнително, вели тој, ставот е надграден со пет посебни различни комисии за надградба на овие односи.

Тој рече дека на Бугарија и Северна Македонија им е потребен заеднички културен календар и интеракција меѓу бизнис секторите на двете соседни земји.