МНР денеска ќе го повика бугарскиот амбасадор во Скопје, Желјаско Радуков, да даде објаснување за фотографирањето на претседателите Румен Радев и Гордана Сиљановска Давкова.

На средбата завчера во Софија имаше само бугарски знамиња, а претседателката Сиљановска Давкова беше пречекана без македонското. Во македонската делегација беа и министрите за надворешни работи и трговија Тимчо Муцунски и за култура Зоран Љутков.

За денеска во 11 часот е закажан и брифинг за медиуми на шефот на дипломатијата Тимчо Муцунски за досегашните и идните активности, како и за актуелни прашања од доменот на работата на МНРиНТ.

Од Кабинетот на претседателката Сиљановска – Давкова во саботата најавија дека ќе побараат објаснување за фотографијата пред бугарското знаме направена во Кабинетот на претседателот на Бугарија иако, како што нагласуваат оттаму, ваков потег и чин не бил предвиден, ниту договорен.

Радуков како новоименуван амбасадор на Бугарија во Скопје на 10 септември и ги предаде акредитивните писма на претседателката Сиљановска Давкова, заменувајќи го досегашниот амбасадор  Ангел Ангелов.