Претседателот на ДУИ, Али Ахмети, денеска во партиското седиште во Тетово го прими бугарскиот амбасадор во Скопје, Ангел Ангелов, при што му пренесе дека „Владата прави фабрикувани дестабилизации и дека најавите од таму за наводни дестабилизации се провокација“.

На средбата се зборувало за патниот и железничкиот Коридор 8, уставните измени, за договорот за добрососедство со Бугарија и за изборните резултати.

„Истовремено, г. Ахмети истакна дека ДУИ е државотворна партија, а непостоечките тврдења на премиерот Мицкоски за сценарија за дестабилизација се невистинити и претставуваат намерни и опасни владини сценарија за обвинување други за да се дефокусира јавноста од недостатокот на резултати и секојдневни владини скандали.

ДУИ го докажа својот придонес за стабилноста и безбедноста и се спротивставува на секој политички инсценаторски обид за дестабилизација и ги повикува Албанците и другите да не станат плен на провокациите на власта без етнички легитимитет“,објави ДУИ.

Ахмети потсети дека албанската коалиција ВЛЕН ветила уставни измени за шест месеци по изборите и рече дека ДУИ останува посветена на евроинтеграциите.

„Соговорниците се согласија дека Коридорот 8 е регионален и евро-американски приоритет и затоа Владата треба без одлагање да ги продолжи проектите за патно и железничко поврзување“, се дополнува во соопштението.