Повторно се огласија од правниот тим на Бојан Јовановски со прекар Боки 13, од каде потенцираат дека тој од болничко лекување е вратен во затворот „Идризово“ во пред канцерогена состојба. 

- Ваквото постапување е спротивно на препораките дадени од десетици лекари кои го лекуваа Јовановски во изминатиот период, спротивно на конзилијарните мислења и лекарските извештаи. Во нив јасно стои дека без прекин на казната, услови за лекување на метаплазието на желудник не може да се спроведе во пенални услови, а со оглед на специфичната состојба во која се наоѓа - се наведува во соопштението испратено до редакцијата.

Од правниот тим посочуваат дека предканцерогената состојба на Јовановски имаат хистопатолошки наод од Институтот за патологија при Медицинскиот факултет во Скопје каде се констатира: „Наодот одговара за хроничен гастритис со фокуси на интестинална метаплазија“.

- Од медицинската документација, јасно стои: „Доколку не се спроведат дадените препораки за понатамошно лекување на пациентот исклучиво и единствено во задолжителни домашни услови, согласно сето погоренаведено ќе настанат трајни последици по животот и здравјето на пациентот. Наодот е реферириран на стручен колегиум на ЈЗУ УК св. Наум Охридски и стручниот колегиум  е едногласно согласен за дадените препораки и упатство за понатамошно лекување - пишуваат во сооштението.

Притоа додаваат дека и од Клиниката за дигестивна хирургија е посочено: „Се придржуваме кон препораките издадени од колегите од  ЈЗУ УК св. Наум Охридски, со оглед на фактот дека пациентот таму е опериран и лекуван и од ЈЗУ за Гастроентерохепатолигија каде што е прегледуван и иследуван“.

- Потсетуваме дека Јовановски веќе алармираше дека е мета на невидена и незапаметена тортура, која исто така, влијае на неговото здравје. Враќањето на Јовановски во пенални услови и во ваква здравствена состојба не претставува само грубо кршење на неговите права, туку и опасност за неговиот живот. Јовановски очекува тортурата кон него да биде поинтензивна и поради сите јавни објави. Ја повикуваме јавноста будно да го следи процесот кој тој го иницираше - заклучуваат од правниот тим.

Дел од документацијата доставена до нашата редакција: