Саша Богдановиќ, градоначалник на општина Центар, и се заблагодарти на СДСМ за укажаната доверба да раководи со Центар во мандатот кој изминува, честитајќи им на сите предложени кандидати од неговата партија.  

„Би сакал јавно да се заблагодарам на мојата матична партија СДСМ за укажаната доверба и поддршката да бидам градоначалник на Општина Центар изминативе четири години.

Тоа беше огромен предизвик за мене и задоволство да ја водам најурбаната и најмодерната општина и заеднички со граѓаните на Центар да креираме нова визија за општината по европски модели за работа и стандарди.

Им честитам на предложените кандидати.

Се надевам дека во новата изборна програма проектите ќе бидат насочени кон паметно урбанистичкото планирање на централното градско подрачје, хуманизација на просторот и ослободување на јавните површини, изградба на нови училишта и градинки, детски и спортски игралишта, реконструкција на улици, зголемување на јавното зеленило, како и реализација на проекти за #НулагГладВоЦентар, #ЦентарРециклира, #СмартЦентар, #ИОтпадотИмаВредност и #ЗеленЦентар.

Во изминативе четири години докажавме дека работиме одговорно, посветено и транспарентно во интерес на нашите граѓани. Инвестиравме во инфраструктура за изградба на нови паркиралишта и резидентни зони за подобрување на условите со паркирањето во Центар. Инвестиравме во нови смарт проекти за #ЗеленЦентар и заштита на животната средина. Изградивме најмодерно училиште во нашата држава за современо образование, отворивме нова детска градинка, ги модернизиравме детските игралишта на цела територија во Општина Центар и отворивме нов Младински Центар – Матично, прогресивен симбол во градот за креирање на младинските политики и практики. Отворивме нов мултимедијален простор „Јадро“, платформа за независната културна сцена и граѓанскиот сектор за проекти во културата во разни уметнички дисциплини. Преку реализација на нашите инфраструктурни проекти, полека ја заокруживме целината што ја најавуваме, а тоа е Дебар Маало да биде резидентно маало. Започнавме со реализиација на капиталниот проект за целосна реконструкција на „Мирослав Крлежа“ и пренамена на улицата во пешачка зона. Во завршна фаза сме од реконструкцијата на најголемата сообраќајница во Дебар Маало, улицата „Орце Николов“, која ќе добие нов модерен лик, зголемена безбедност за сите учесниици во сообраќајот и ослободување на јавните површини за стимулирање на пешаците и велосипедистите. И, по 12 години успеавме да ги вратиме надлежностите на општината и ја преземавме целосната контрола за користењето на јавните површини и поставување урбана опрема на одредени подрачја во Општина Центар. Обезбедивме нови специјални комунални возила за почисти улици и зголемување на јавната хигиена и чистота, изградивме многу нови маалски катчиња и простор за рекреација за жителите. И најважно, од мојот мандат па досега, наплатени се 4.000.000 евра по разни основи, судски пресуди и активирани банкарски гаранции“, пишува меѓу другото Богдановиќ.

Вели и дека останале и капитални проекти што не се завршени, како што се изградбата на новата детска градинка во населбата Пролет, изградбата на катната гаража, доградбата на училиштен објект во ООУ „Коле Неделковски“, за кои искрено верува дека идниот градоначалник ќе ја продолжи нивната завршна реализиција.

„Најискрено би сакал да се заблагодарувам на мојот тим и целиот колектив од општинската администрација, која што од самиот почеток веруваше во мене и со нивната поддршка и доверба, заеднички успеавме да реализираме 70 отсто од изборната програма. Општина Центар никогаш не била во подобра финансиска и стабилна позиција, која има капацитет самостојно да ги реализира предвидените проекти. Затоа сум особено горд што заеднички успеавме“, пишува Богдановиќ.

На крај тој им се заблагодарува на сите жители во Центар кои секојдневно наоѓале време да му се заблагодарат и да ми ја изразат поддршката и благодарноста за неговата работа.