Двајцата битолчани кои објавија фотографии на социјалните мрежи како држат заробен златен орел добија кривични пријави за мачење на животни.

„Првоосомничениот Н.С., откако фатил орел златен сури, го однел во дворот на семејната куќа, го врзал со јаже и на таков начин го изложил на непотребни маки и му нанел непотребни болки. Наредниот ден двајцата битолчани насилно му ги рашириле крилјата на орелот и се фотографирале со него, а потоа и ги објавиле сликите на социјалната мрежа „Фејсбук““, информираат од МВР.

Овој вид орел, познат како златен сури, е заштитен затоа што е пред целосно исчезнување на територијата на Македонија. Први по настанот реагираа од македонското здружение за заштита на бувови МОТ, а веста со огромни осуди веднаш се рашири по социјалните мрежи.