Битиќи одби средба со Мицкоски за енергетската криза во штабот на ВМРО-ДПМНЕ
И вицепремиерот Фатмир Битиќи ја одби поканата за средба од страна на лидерот на ВМРО-ДПМНЕ, Христијан Мицкоски, за разгледување на „концептот за ублажување на последиците од енергетската криза и спас на работни места“ со кој опозицијата нуди договори со компании кои би обезбедиле поевтин природен гас и мазут за Македонија.
„Еве, повторно, вратите се отворени, решенијата секогаш се наоѓаат на маса на која сите седиме заедно. Нема потреба од разговор во 4 очи, зад затворени врати. Комплексноста на оваа криза од нас бара да се кренеме над себе, бидејќи солидарност, одговорност и колективна мудрост е она што ќе не изнесе низ неа“, напиша вчера Битиќи на Фејсбук
Според вицепремиерот, економските политики се креираат институционално во Владата, на Економскиот совет и со учество на сите засегнати страни.
„Нудам концепт не само за оваа есен и зима туку и за следната година. Од сето ова политички поени не ме интересираат кога цената е иднината на Македонија и илјадници луѓе чии работни места се под знак прашање.
Сакам вистински да се помогне, затоа што работите се пресериозни и поважни од суетата на било кој член на владата. Во услови кога Димитар Ковечевски дезертира, бега од средба и ТВ дуел со мене, го поканувам заменикот на претседателот на Владата задолжен за економски прашања Фатмир Битиќи на состанок во Недела (2/октомври/2022) во 12 часот во Седиштето на ВМРО ДПМНЕ, каде детално ќе го објаснам планот и концептот кои ќе значат закрепнување на економијата и помош на бизнисот“, гласеше претходно поканата од страна на Мицкоски упатена до Битиќи.
Слично
Поврзани вести
