Кобната ноќ на 16 март 2025 г. го претвори животот на секој Македонец во црнило. Оваа ноќ која требала да биде извор на забава, музика, смеа и моменти за паметење, се претвори во мрак, црнила и огнени јазици кои однесоа цели генерации полни со надеж и соништа.

Смртоносниот пожар во кочанската дискотека „Пулс“ однесе 63 млади животи, и остави 63 семејства без да го дочекаат своето чедо да си дојде дома. Над 200 луѓе беа повредени од овој пожар и голем дел од нив завршија на лекување во странство.

Еден од повредените бил и Иван Стојменов, кочанчанец кој присуствувал на забавата таа ноќ. Тој се здобил со тешки повреди и бил хоспитализиран во Словенија, каде 10 дена бил во кома и потоа следувала едномесечна борба за оздравување.

Тој на својот Фејсбук профил го споделил своето трагично искуство кое го проживеал таа вечер. Изјавата ви ја пренесуваме во целост:

„Помина една година од ноќта што засекогаш ми го промени животот.

Ноќта кога во дискотеката „Пулс" избувна пожар и се за неколку секунди се претвори во хаос, чад и страв. Нокта кога животот и смртта беа толку блиску.

Со изгореници по рацете, лицето и дишните патишта, завршив во болница во Словенија. 10 дена кома и скоро 1 месец борба... борба за здив, за сила, за живот. Докторите велеа дека е критично.

Но Господ имаше други планови.

Денес сум тука. Со лузни што засекогаш ке ме потсетуваат на таа нок. Лузни што не се само на кожата, туку и во душата.

Таа ноќ никогаш нема да се заборави. Никогаш нема да ги заборавиме луѓето што не успеаа да излезат. Нивните животи и нивните приказни засекогаш ќе останат во нашите срца.

Оваа година ме научи нешто што многумина го забораваат - животот е кревок. Секој ден е подарок. Секој здив е благослов.

Денес сум благодарен на бога што сум жив. Благодарен на докторите, на моето семејство и на сите луѓе што беа покрај мене кога беше најтешко.

Животот ми даде втора шанса.

И ветувам дека ќе ja живеам така како што заслужува.

Никогаш да не се повтори!!!!! Вечна им слава на починатите “

Извор: Женски Магазин