Најновиот извештај 13F на компанијата Berkshire Hathaway, објавен во петокот, покажува дека компанијата во првиот квартал од годината излегла од своите позиции во повеќе фирми, меѓу кои се Amazon, Mastercard, Visa и UnitedHealth Group.

Во меѓувреме, „Беркшир“ одлучил да го зголеми својот удел во компаниите Alphabet, матичната компанија на Google, и The New York Times Company, а купил и акции во Delta Air Lines и Macy’s.

Извештајот покажува и дека компанијата ги намалила своите позиции во Bank of America, Chevron и Nucor. Според Reuters, „Беркшир“ во првиот квартал направил нова инвестиција од околу 2,65 милијарди долари во Delta Air Lines, а воедно пријавил и помал удел во Macy’s.

Reuters додава дека Berkshire повеќе од тројно го зголемил уделот во Alphabet, кој сега вреди околу 16,6 милијарди долари, и повеќе од двојно го зголемил уделот во The New York Times, каде поседува околу 9% од акциите. 

Ова беше прв финансиски квартал за „Беркшир Хатавеј“ откако Грег Абел ја презеде функцијата извршен директор, по повлекувањето на Ворен Бафет од таа позиција. Бафет сега е претседател на Управниот одбор.

Промените се дел од пошироко преструктурирање на инвестициското портфолио на компанијата, кое следуваше по заминувањето на инвестицискиот менаџер Тод Комбс. Според Reuters, пријавениот портфолио-извештај опфаќа акции вредни околу 288 милијарди долари заклучно со 31 март 2026 година.