Уште 30 дена притвор доби екс министерот за економија, Крешник Бектеши кој е осомничен за случајот со пожарот во дискотеката Пулс во Кочани, каде на 16 минатиот месец загинаа 59 луѓе. Судот одлучи да ја продолжи мерката за Бектеши кој е опфатен со истрагата, поради постоење на основано сомнение за злоупотреба на службена положба и овластување.

Одлуката следи по укажувањата на државниот обвинител Љупчо Коцевски, кој изјави дека министри за економија, меѓу кои и Бектеши, издавале лиценци за работа на кочанската дискотека врз основа на непотполна и некомплетна документација.

Поранешниот градоначалник на Кочани, Љупчо Папазов, кој поднесе оставка после пожарот, оди во куќен притвор. По барање на обвинителството, истата мерка е изречена и за уште тројца осомничени, меѓу кои поранешниот директор на Државниот пазарен инспекторат Горан Трајковски, еден инспектор и член на обезбедувањето. 

На 16 март во пожарот загинаа 59 луѓе, а потоа починаа уште двајца повредени, додека денеска има уште една жртва, со што бројот на загинати засега е 62. 

После пожарот, гневните граѓани го демолираа кафулето на газдата на Пулс, а отидоа и пред куќата на Папазов да го изразат револтот.