Во врска со бегството на поранешниот вицепремиер Артан Груби од Македонија, Блерим Беџети рече дека не знае детали, но го повика поранешниот сопартиец да се врати.

„Артан Груби веќе не е дел од ДУИ. Тој се повлече, пред партиските органи да донесат таква одлука“, рече денеска организацискиот секретар на интегративците и пратеник,  Беџети во гостување во ТВ21.

Беџити вели дека ДУИ ги почитува, ги прифаќа и има сериозен пристап кон одлуките на Стејт Департманот за црната листа.

„Артан Груби јавно го повикувам, во име на партијата и во мое лично име, да се пријави пред органите на правдата, за да се соочи. Значи, станува збор за случајот со Државна лотарија, а не за црната листа на САД, тоа е нешто друго. Како секој граѓанин, и како носител на јавна функција, ако е чист како што кажува или пак прекршил закон, тоа треба  се констатира во органите. Се надевам дека поскоро ќе се соочи, тој, и многу други“, изјави Беџети.

Од ВМРО-ДПМНЕ денеска побараа СДСМ и ДУИ да го повикаат Груби да се врати.

Министерството за внатрешни работи на сајтот на МВР во делот за потраги, ги објави фотографиите на поранешниот вицeпремиер Артан Груби и екс директорот на Лотарија Перпарим Бајрами.

фото принтскрин