Глобалната авио-индустрија се соочува со сериозен притисок поради растот на цените на горивото, предизвикан од ескалацијата на конфликтот на Блискиот Исток. Затворањето на воздушниот простор, проблемите со снабдувањето и блокадата на Ормускиот теснец доведоа до масовни откажувања летови и значително поскапување на авионските карти.

Според Европската федерација за транспорт и животна средина, цената на летовите на долги релации од Европа може да се зголеми за околу 90 евра по патник. Анализите покажуваат дека лет од Барселона до Берлин би бил поскап за околу 26 евра, додека лет од Париз до Њујорк би поскапел и до 129 евра поради повисоките трошоци за гориво.

Нови такси и повисоки цени

Цената на авионското гориво во последните недели скокна од 85–90 долари на 150–200 долари за барел, што претставува огромен удар за индустријата, каде горивото учествува со околу 25 проценти од трошоците.

Како одговор на ова, бројни авиокомпании воведуваат нови доплати:

„Ер Франс“ ги зголеми цените на билетите за долги летови за 50 евра, а на дел од рутите и до 100 евра

„Чајна Истерн Ерлајнс“ воведе доплати од 8 до 17 долари на домашни летови

Индиската „ИндиГо“ наплатува до 2.300 рупии за летови кон Европа

„СанЕкспрес“ од мај воведува доплата од 10 евра по патник

Поскапува и багажот

Покрај билетите, некои компании ги зголемуваат и цените за багаж:

„Американ Ерлајнс“ ги зголеми таксите за чекиран багаж за 10 долари

„ЏетБлу“ воведе поскапување од 4 до 9 долари

„Делта“ ги зголеми цените за багаж и воведе дополнителни такси

Откажувања и штедење

Некои авиокомпании се одлучуваат и за намалување на летовите. „Луфтханза“ најави укинување на околу 20.000 летови до октомври, како дел од мерките за намалување на трошоците.

Поголеми трошоци за патниците

Експертите предупредуваат дека, доколку кризата продолжи, патниците ќе се соочат со:

повисоки цени на билетите

дополнителни такси

намален избор на летови

Во исто време, нискобуџетните компании како „Рајанер“ предупредуваат дека можат да ги намалат летовите од одредени аеродроми поради високите трошоци, што дополнително ќе го ограничи изборот за патниците.

Заклучокот е јасен – растот на цените на горивото директно се прелева врз патниците, а летањето во наредниот период ќе стане поскапо и покомплицирано.

Курир.рс