Неколку големи авио-компании најавија зголемување на цените на авионските билети поради наглиот раст на цената на горивото, предизвикан од конфликтот на Блискиот Исток и нарушувањата во глобалниот воздушен и поморски сообраќај.

Австралиската авиокомпанија „Квантас ервејс“, скандинавската SAS и „Ер Њу Зиланд“ веќе потврдија дека ги зголемуваат тарифите, посочувајќи дека цените на авио-горивото драматично пораснале.

Според податоците на „Ер Њу Зиланд“, цената на млазното гориво, која пред американско-израелските напади врз Иран изнесувала меѓу 85 и 90 долари за барел, сега достигнува 150 до 200 долари. Поради неизвесноста околу конфликтот, компанијата дури ја суспендирала и финансиската прогноза за 2026 година.

Зголемувањето на цените на нафтата е поврзано со нарушувањата во транспортот низ Ормутскиот теснец, една од најважните светски рути за извоз на нафта. Конфликтот доведе до поскапување на горивото, ограничување на воздушниот простор и раст на трошоците за авиопревозниците.

Портпарол на SAS изјави дека зголемувањето на цените е неопходно за одржување на стабилни операции.

• Зголемување од вакви размери бара привремено прилагодување на цените за да се одржи сигурен и стабилен авио-сообраќај, изјави портпаролот за „Ројтерс“.

Во меѓувреме, некои компании се обидуваат да се заштитат од ценовните шокови. „Луфтханза“ и „Рајанер“ обезбедиле дел од потребното гориво по фиксни цени, додека финската авиокомпанија „Финеир“ предупреди дека, доколку конфликтот потрае, може да се појават проблеми и со самата достапност на гориво.

„Ер Њу Зиланд“ веќе ги зголеми цените на билетите:

• за домашни летови за 10 новозеландски долари,

• за кратки меѓународни летови за 20 долари,

• а за долги летови за 90 долари, со можност за дополнителни поскапувања доколку цените на горивото продолжат да растат.

Горивото е вториот најголем трошок за авиокомпаниите, веднаш по трошоците за работна сила, и обично учествува со 20 до 25 проценти од оперативните трошоци.

Покрај поскапувањето на горивото, ситуацијата ја комплицира и ограничениот воздушен простор. Пилотите се принудени да ги менуваат рутите за да го избегнат конфликтниот регион, што дополнително ги зголемува трошоците и времетраењето на летовите.

Авиокомпаниите од Блискиот Исток како „Емирати“, „Катар ервејз“ и „Етихад“ имаат голем удел во патничкиот сообраќај меѓу Европа и Азија, па секое нарушување на воздушниот простор може да има сериозно влијание врз глобалната туристичка индустрија.