Благодарение на силните резултати од продажбата, Атлантик Група ја зголеми профитабилноста и покрај сè уште рекордно високите цени на суровото кафе и какао, како и континуираните инвестиции во вработените и клучните проекти.

Компанијата во 2025 година оствари приходи од продажба од 1,19 милијарди евра, што претставува раст од 10,2 проценти во однос на претходната година. Добивката пред камати, даноци и амортизација (EBITDA) се зголеми за 9,3 проценти и достигна 106 милиони евра, додека нето-добивката порасна за 20,9 проценти, на 32 милиони евра.

„И покрај предизвикувачката деловна средина, Атлантик Група ја заврши 2025 година со одлични резултати. Силен раст на приходите беше постигнат во речиси сите деловни и дистрибутивни области и на сите клучни пазари. Годината донесе стабилизација на профитабилноста и благо подобрување на нормализираната EBITDA маржа, тренд за кој веруваме дека ќе продолжи и во наредниот период. Продолживме да инвестираме во брендови, луѓе, модернизација, иновации и партнерства кои го поддржуваат долгорочниот раст. Во 2026 година влегуваме уште посилни и подготвени да градиме одржлив и одговорен развој“, изјави Емил Тедески, извршен директор на Атлантик Група.

Кафето и деликатесните намази носители на растот

Најголем раст на приходите од 27,1 процент е остварен во стратешката деловна област Кафе, по што следуваат Деликатесните намази со раст од 10,2 проценти и Донат со раст од 9,9 проценти. Кафето е и најголемата поединечна категорија со удел од 26,6 проценти во вкупните приходи.

Меѓу дистрибутивните пазари, Србија бележи раст од 19,9 проценти, а Македонија од 14,8 проценти. Значителен раст е остварен и на пазарите во Германија и Босна и Херцеговина.

Сопствените брендови учествуваат со 64,1 процент во вкупната продажба, од кои 27,1 процент се главни брендови, а 8,8 проценти се од фармацевтскиот сегмент.

Фокус на стратешките приоритети

Годината беше обележана и со важни стратешки потези. Со продажбата на Монтана Плус продолжи процесот на излегување од несуштинските активности. Атлантик Дрога Колинска поднесе обврзувачка понуда за преземање на Осем д.о.о., со цел зајакнување на сегментот деликатесни намази, при што трансакцијата е условена со одобрение од словенечката Агенција за заштита на конкуренцијата.

Со преземањето на аптеките Делтис Фарм од страна на Белупо, фармацевтскиот сегмент дополнително ја зацврсти својата позиција на пазарот.

На Генералното собрание во јуни беа избрани три нови членови на Надзорниот одбор – Андреа Гисле Јосен, Флоренс Жанте и Бранислав Бибиќ, а во септември Мојца Домитер беше назначена за член на Управниот одбор задолжена за човечки ресурси и култура, со што дополнително се зајакна менаџерскиот тим.

Лидер во одржливоста и управувањето со човечки ресурси

Атлантик Група беше рангирана како петти најпосакуван работодавач во Хрватска според анкетата „Работодавач на прв избор“, а во Босна и Херцеговина беше прогласена за еден од трите најдобри работодавачи.

Компанијата го доби сертификатот „Шампион за еднакви плати“, што ја потврдува посветеноста на еднаква плата за еднаква работа и унапредување на жените на раководни позиции.

Во областа на одржливоста, Атлантик ја освои првата награда во категоријата „Енергетски ефикасна компанија“ на Деновите на енергија во Словенија, а во Србија проектот „Зелен бран“ ја доби главната награда за ESG комуникација на годината. Втора година по ред компанијата е препознаена како ESG шампион од AmCham Croatia и Kearney.

На крајот од годината, во соработка со Загрепската берза, „Пословни дневник“ ѝ ја додели на Атлантик Група втората награда за најдобри односи со инвеститорите.