Ѕвездата од филмот „Медена Земја“, Атиџе Муратова, во рамките на Еразмус плус програмата на учениците од „Методија Митевски – Брицо” од Лозово им покажуваше стари маалски игри.

Освен со локалните деца, таа другаруваше и со нивните гостинчиња од Португалија, Бугарија и Грција. Средбата беше во рамките на проектот „Играј и учи за младоста” , финансиски поддржан од Европската комисија за образование, а кој е посветен на учење на децата на веќе подзаборавените детски игри од училишните дворови и улиците.

Атиџе им раскажуваше на децата за своето детство, а евоцираше спомени за своите детски игри и куклите од дрво и волна и партали, кои самата ги изработувала. 

Таа им упати силни пораки на децата да се дружат преку игрите и им порача за да бидат здрави секое утро да јадат по едно лажиче мед со лимон, но и да се дружат со пчелите, бидејќи тие го одржуваат светот и им рече секогаш кога се во друштво и со секого сè да делат пола пола.

Атиџе порача дека секое дете се приврзува кон возрасниот ако тој му посвети време, а за родителите рече да не трчаат само по работа туку да ги учат децата на вистинските вредности.

-Родителите се тие кои ги изведуваат децата на прав пат и кои треба да ги оттргнат од лошите патишта.Но и децата треба да ги почитуваат родителите па и да се грижат за нив кога ќе остарат, порача Атиџе.