И во политичка смисла и како државен симбол Гоце Делчев по националност е Македонец, реагира екс пратеникот и заменик-министер за образование од СДСМ, Петар Атанасов. 

Тој додава дека Гоце Делчев не смее да биде предмет на преговори со Бугарија.

„И во политичка смисла и како државен симбол Гоце Делчев по националност е Македонец. Со кој памет некој се обидува да преговара за неговиот етнички идентитет за кој во науката се знае дека има објективни и субјективни елементи. Таа тема не смее да биде на дневен ред“, напиша Атанасов на Твитер.

Пратеникот од ВМРО-ДПМНЕ Антонио Милошоски денеска на Фејсбук објави дека „дипломатски извори во МНР споделуваат дека последниот предлог на официјална Софија е дека премиерите Заев и Борисов за време на предвидената средба на 11ти ноември во Бугарија би требало да се согласат на следнава дефиниција за Гоце:

"Гоце Делчев е Македонец во регионална смисла на зборот, но во смисла на народно-етничката припадност Гоце Делчев е Бугарин роден во географската област Македонија"

Владата денеска преку Македонската информативна агенција го оцени како шпекулација тврдењето на пратеникот Антонијо Милошоски дека е дефиниран предлогот за  идентитетската припадност на Гоце Делчев на кои би требало да се согласат премиерите Зоран Заев и Бојко Борисов пред Самитот на Берлинскиот процес во ноември.

Минатата недела имаше средба меѓу македонските и бугарските историчари, но договор нема, туку само мал напредок на тема Гоце Делчев.