Артан Груби го нема да се огласи на ниту една социјална мрежа, откако првично напиша дека отишол во приватна посета на Косово. 

Неговиот некогашен сопартиец, а сега вицепремиер Изет Меџити, смета дека тој можеби е во Албанија. 

Но, она што е интересно, е како денеска се произнесоа од неговата матична партија ДУИ за Артан Груби, е дека не ги коментираат наводите  на Меџити, бидејќи, како што изјавиле за ТВ 24, „Груби“ повеќе не е дел од ДУИ“.

Малку необично така да коментира една партија за еден од своите до скоро најистурени играчи, човекот кој секогаш му беше десна рака на Али Ахмети.

Како што е веќе познато, Артан Груби и поранешниот директор на АД „Државна лотарија“, Прпарим Бајрами, се осомничени дека како соизвршители и одговорни лица во тоа државно акционерско друштво, вршејќи ги своите посебни овластувања и должности, во 2023 година направиле штета на акционерското друштво со намера противправно да прибават буџетски средства на Лотарија во износ од над 8 милиони евра. Обвинителството ги сомничи за кривичното дело проневера во службата.

Кривичниот суд им одреди 30-дневен притвор, кој ќе почне да се спроведува по нивното обезбедување во земјата бидејќи во моментов не се достапни за органите на прогонот.

За Груби и Бајрами се објавени меѓународни потерници.