Комисијата за спречување на корупција на вчерашната седница донела мислење со кое членовите се произнеле по барањето од пратениците на ВМРО-ДПМНЕ дали разрешувањето на јавниот обвинител, Марко Зврлевски, е спротивно на член 8 од Изборниот законик со кој по распишување на избори се забранува вработување или отпуштање во државни институции. Комисијата едногласно одлучила дека разрешување на јавниот обвинител Марко Зврлевски како и било кој друг функционер е спротивно на законот.

Мислењето на Комисијата е доставено до Собранието. Претседателот на Собранието, Талат Џафери, пак, неколку пати нагласи дека мислењето на Комисијата не е релевантно за расправата на Собранието.

- Јас немам намера како претседател на Собранието да се обраќам на каков било друг орган кој ќе кажува како јас треба да работам, кога тоа јасно го кажува Деловникот и Уставот. Антикорупциска е дел од извршната власт и таа неможе да дава препораки на законодавната власт. Ако имате дилема, може да побарате автентично толкување на законот – истакна Џафери за време на седниците.