Вицепремиерот за економија, Кочо Анѓушев не смета дека ја злоупотребил државната функција при укинувањето на царината за увоз на електрични литиум –јонски акумулатори. 

 Анѓушев oдговори на обвинувањата упатени од ВМРО-ДПМНЕ.

„Станува збор за литиум – јонски акумулаторски батерии за производство на возила, за електрични возила. Не станува збор за акумулатори кои што ги има во секое возило. Одредбата е само за производители, а е на иницијатива на Полска компанија која што има намера во Македонија да отвори фабрика за мали автобуси кои што ќе бидат на електричен погон, а предуслов за отворање на таа инвестиција е практично да се случи ова. Но тоа не е само заради фабриката. Целиот свет оди на електрични автомобили“- вели Анѓушев. 

Додава дека при купување на електричен автомобил доаѓа до ослободување од акциза, со цел да се стимулира еколошкиот аспект, согласно европските стандарди и текови.

СДСМ ја претвори државата во приватна фирма, која работи за потребите на партијата и бизнис моќниците во врвот на власта и безсрамно преку владата со парите на граѓаните ја плаќа царината за акумулаторите кои ги увезува фирмата на вицепремиерот задолжен за економски прашања Кочо Анѓушев, реагираа деновиве од ВМРО-ДПМНЕ.