Во справувањето на пожарите од воздух на располагање се ставени двата „ер трактори“ на Дирекцијата за заштита и спасување(ДЗС) и два полициски и два армиски хеликоптери. Третиот „ер трактор“ кој е на сервис, се очекува да биде вратен во Македонија на почетокот на август. 

Директорот на ДЗС, Стојанче Ангелов денеска информираше дека кај овој „ер трактор“ дополнително се откриени дефекти. 

„Во моментов имаме два „ер трактора“, третиот треба да биде вратен од сервис на почетокот на август. Фирмата која го работи сервисот, најверојатно се соочува со голем обем на работа и не може да постигне. Тој е благовремено однесен и веќе подолго време е таму, но дополнително кај него се откриени дефекти кои биле непредвидени поради што сервисот се развлекува подолго време“, рече Ангелов на денешната прес-конференција. 

Во случај на влошување на состојбата со пожарите, Ангелов посочи дека може да се побара и меѓународна помош, но дека во моментот тоа не е најсоодветната опција бидејќи и другите држави се справуваат со пожари. 

фото ДЗС