Германските производители на автомобили ја започнаа 2026 година со остар пад на профитот и заостануваат во меѓународните споредби. Според студијата на консултантската фирма EY, профитот на три германски компании; Фолксваген, Мерцедес-Бенц и БМВ се намалил за 23 проценти во првиот квартал, објавува tagreschau.

Пад на приходите

Во исто време, американските компании успеаја да го зголемат својот профит за 83 проценти. Германските производители на автомобили беа исто така единствените што забележаа пад на приходите, за четири проценти, додека американските производители, на пример, постигнаа раст од пет проценти, а нивните јапонски конкуренти пораснаа за четири проценти.

Според соопштението, експертот за автомобилска индустрија на EY, Константин Гал, изјави дека една од причините за значителниот раст на профитот на американските производители, покрај заштитата на американскиот пазар од странски производи, е делумното укинување на увозните тарифи, што доведе до големи поврати на средствата за производителите. Профитабилноста на целата индустрија е под притисок. Просечната маржа на 19-те најголеми производители на автомобили, или односот помеѓу профитот и приходите од продажба, падна на 3,5 проценти, достигнувајќи го најниското ниво од пандемиската 2020 година.

„Кризата е далеку од завршена, особено за германските производители на автомобили. Германската автомобилска индустрија поминува низ длабока структурна трансформација. Затворањето на странските пазари, скапиот вишок производствен капацитет, големите инвестиции во софтвер и бавниот развој на електромобилноста се одразуваат на деловните резултати“, рече Гал.

Сузуки на врвот

Според студијата, јапонскиот производител Сузуки ја предводи листата на најпрофитабилни автомобилски компании со маржа од 10,9 проценти, по што следуваат американскиот индустриски лидер Џенерал Моторс со 9,4 проценти и јужнокорејската Киа со 7,5 проценти.

БМВ е на четвртото место со маржа од 6,5 проценти, Мерцедес-Бенц е на шестото место со 6,0 проценти, додека Фолксваген е на 13-то место со 3,3 проценти. Водењето бизнис во Кина се покажува сè потешко. Продажбата на германски автомобили на тој пазар падна за дури 16 проценти. „Кина останува еден од најголемите проблеми за германските компании“, рече Гал. Пазарот е исклучително конкурентен, а скапите премиум возила се продаваат слабо поради забавувањето на економијата. Во растечкиот сегмент на електрични возила, кинеските купувачи претпочитаат домашни брендови.

Покрај тоа, предизвикувачката глобална средина ги влошува работите уште повеќе за производителите. „Геополитичките тензии, национализмот, трговските бариери и променливите политички преференции за една или друга технологија на погон го карактеризираат деловното опкружување“, рече Гал. Германските компании се во многу тешка позиција бидејќи повеќе не можат да имаат корист од слободната глобална трговија.