Ние сме дел од мнозинството и нема да го прекршиме договорот, изјави лидерот на ДУИ, Али Ахмети по средбата со еврокомесарот, Јоханес Хан.

Првиот човек на ДУИ вели дека ги дале нивните потписи за парламентарно мнозинство и не планираат да ги прекршат  ветувањата.

„Се надевам дека ВМРО-ДПМНЕ и СДСМ ќе ги надоместат разликите и во интерес на државата ќе најдат решение за да продолжат институциите да функционираат. Ние не сме бунтовници да завземаме институции. Се надевам дека ќе се најде начин на мирен начин да се најде прифатливо решение“- изјави Ахмети.

Ахмети рече дека имаат државна и национална одговорност. На сите им порача да бидат внимателни и да инвестираат во функционирањето на институциите. Ахмети  очекува дека ќе има резултат каков што очекуваат во ДУИ, но и сите граѓани на Македонија. 

Хан денеска е на средба со политичките лидери во земјата. Тој единствено не се сретна со шефот на државата Ѓорѓе Иванов, кој информираше дека неговите ставови се познати. 

По завршување на сите средби се очекува Хан да испрати соопштение до медиумите.