Агим Красниќи, осуденикот познат по тоа што подготвуваше напад на Скопје, не се пријавил во затвор Штип по викенд отсуството и официјално во сите надлежни институции сега се води како бегалец.

Ова го потврди директорот на затворот Мики Тодоров, кој забележува дека изминатите години Красниќи има користено викенд отсуства и секогаш се враќал во затвор Штип на издржување на казната затвор.

Красниќи има единствена казна затвор од 15 години и ја издржува од 2008 година, што значи дека му преостануваат уште три за злосторничко здружување и поседување оружје и други кривични дела.

Красниќи во 2005 година во село Кондово со својата група подготвуваше извршување напад на Скопје. 

Заканите на групата облечена во воени униформи и вооружена со автоматски пушки, снајпер, зољи и ракетни фрлачи претставуваа терористичка опасност за главниот град.