Агенцијата за аудио и аудиовизуелни медиумски услуги смета дека премиерот Зоран Заев не требало да го ангажира новинарот Љубиша Станковиќ како свој советник, бидејќи се јавува судир на улоги затоа што истовремено станува збор и за вработен во медиум. Во истото соопштение се алудира и на Ѓорги Калајџиев, кој е исто така медиумски работник, но не новинар, туклу водител во телевизија, а истовремено се најде на листата на советници.

Тоа, според АВМУ, претставува пречка за поставување професионална дистанца при информирањето на јавноста и да ја загрози слободата на изразување. Ваквиот двоен ангажман може да претставува пречка за поставување професионална дистанца при информирањето на јавноста и да ја загрози слободата на изразување.

-Улогата на медиумите е да бидат критичари и коректори на власта, и во тој контекст, неопходно е при ангажманот на кадарот, да водат сметка дека треба да обезбедат самостојност, независност и одговорност на уредниците, новинарите и другите автори при создавањето на програмите и креирањето на уредувачката политика. Ова е важен предуслов за (меѓу другото) известувањето да биде објективно и непристрасно со  еднаков  третман  на  различните гледишта така што јавноста ќе може самостојно да гради мислење за општествените случувања и настани, наведува во соопштение АВМУ.

Агенцијата, како што наведува во соопштението, за ова ги информирала и премиерот Зоран Заев и двете телевизии.