Министерот за правда Билел Саљији најави денеска дека во наредните денови официјално од Грција ќе биде побарано испорачување на екс претставниците на УБК Горан Грујевски и Никола Бошковски.

Саљији рече дека Кривичниот суд ги завршил бараните документи за екстрадиција и ги проследил до Министерството за правда на понатамошна обработка.

Грујевски и Бошковски моментално се во притвор во Солун.

Тие се приведени поради поседување на лажни пасоши, но судењето е одложено за 4 декември поради немањето на судски толкувач.

СЈО ги гони двајцата екс службеници на тајната полиција во врска со случаите под името Тврдина, Тврдина 2 и обвиненија дека учествувале во уништување на опрема за прислушување.

Грујевски и Бошковски, кои на 18 октомври се уапсени на аеродромот во Солун, користеле лажни бугарски пасоши при обидот за влез во авион за Будимпешта.