Вицепремиерот за европски прашања, Арбер Адеми, на денешната средба со амбасадорот на САД,  Џес Бејли рекол дека комплексноста на ситуацијата во Македонија, во регионот и пошироко, во Европската Унија, налага земјава што побргу да најде излез од политичката криза. 

Тоа треба да се направи користејќи ги расположливите политички и институционални капацитети, за враќање кон реформскиот курс. 

Адеми додал дека Македонија останува на стратешката определба за членство во НАТО и во ЕУ.

„Нема и не размислуваме за друга алтернатива… Улогата на актуелното и на секое идно политичко лидерство е да работи на остварување на тие стратешки приоритети и да ја следи волјата на мнозинството граѓани“-  стои во соопштението. 

Вицепремиерот за европски прашања ја истакнал и важноста на САД како стратешки партнер на Република Македонија, нагласувајќи ја нивната поддршка од осамостојувањето до денеска, како еден од главните промотори за членството на земјава во евро-атлантските структури.

Тој се заблагодарил за помошта што континуирано повеќе од 25 години ја добиваме преку УСАИД, за спроведување на клучните реформи во однос на демократизацијата на општеството, економскиот пораст и на подобрување на квалитетот на образованието.